قيرغيزستان واحدة من الدول الساحرة والمثيرة في آسيا الوسطى، ودولة جاذبة للمسافرين من مختلف أنحاء العالم بجمال طبيعتها الخلابة وتاريخها الغني.
لو انت مصري وترغب في زيارة قيرغيزستان، فإن الخطوة الأولى لك هي الحصول على تأشيرة دخول.
في هذه المقالة، هنشرحلك من تجربتنا طريقة إستخراج تأشيرة دولة قيرغيزستان السياحية للمصريين وهنتعرف على كل تفاصيل التقديم على التأشيرة، لو مهتم بدولة قيرغيزستان لازم تعرف انك محتاج تتقدم بطلب للحصول على تأشيرة دخول عن طريق المتطلبات التالية.
متطلبات تأشيرة قيرغيزستان للمصريين
إنضم لرحلتنا الجاية في شهر يوليو 2024
- نسخة من جواز سفرك أو وثيقة سفرك. لازم يكون فيه ثلاث صفحات فارغة على الأقل وأن يكون صالح لمدة ثلاثة أشهر على الأقل من الوقت اللي ناوي تزور وتغادر فيه دولة قيرغيزستان.
- صورة شخصية بالمواصفات دي: الأبعاد 35 ملم × 45 ملم بخلفية بيضاء ولا ينصح بالنظارات ولو أضطريت لارتدائها فلا تجعلها تغطي عينيك او وجهك.
- حجز طيران ذهاباً وإياباً
- حجز فندق أو دعوة رسمية من شركة أو جهة في قيرغيزستان
كيف يمكنني التقديم على فيزا قيرغيزستان السياحية للمصريين؟
لو المتطلبات اللي فاتت معاك وجاهز، بتقدر تروح تقدم عالفيزا من الموقع الرسمي التالي
https://www.evisa.e-gov.kg
في الموقع بتقدر تضغط على Apply for Visa واللي فيها هتلاقي 6 خطوات تملي فيهم بيانات وتدفع.
الخطوة الأولى:
في اول خطوة بتختار نوع الباسبور ونوع الفيزا اللي انت محتاجها، وفيها اختيارات كتير بس في نوع الفيزا اللي احنا مختارينها هنا هتملى البيانات زي الصورة الجاية ⬇️
هنا احنا اختارنا جواز سفر مصري عادي ونوع التأشيرة سياحة لدخلة واحدة لمدة شهر، واللي حالياً سعرها 51.50 دولار امريكي.
الخطوة الثانية:
تاني خطوة معانا هي بياناتك الشخصية وبيانات باسبورك، اكتبها بالظبط واتأكد من شكل الحروف انها زي جواز السفر بالظبط بعد كده في اخر جزء بتكتب الايميل الشخصي واللي هيتبعتلك عليه تأكيد زي الصورة الجاية ⬇️
هيوصلك عالايميل رقم مرجعي، ده هيكون مهم عشان بيه هتقدر تكمل البيانات وتتابع بعد كده ملف تقديم التأشيرة، ولازم تضغط عاللينك اللي وصلك عشان تكمل البيانات وصلاحية اللينك بحد اقصى 72 ساعة بس.
الخطوة الثالثة:
بعد ما أكدت الايميل بتقدر تملى بيانات الخطوة الثالثة واللي ليها علاقة بفترة اقامتك هناك،
بيانات زي رقم التواصل، بيانات التواصل مع صاحب الدعوة “لو حد بعتلك دعوة من هناك” .. مكان الاقامة، سبب السفر وميعاد دخول والخروج من البلد، وهل زرت قيرغيزستان قبل كده ولا لأ … وكل البيانات دي هتفرق من شخص للتاني.
لكن ممكن مكان الإقامة تختار من على Booking فندق او هوستيل وتحط بياناته وعنوانه.
الخطوة الرابعة:
وصلنا للخطوة الرابعة اللي بترفع فيها ملفات زي
- صورتك الشخصية
- صورة جواز السفر – الباسبور
- اي إقامة لبلد تانية زي دول الخليج مثلا او اوراق تدعم طلبك زي تأشيرات تانية سارية عالباسبور.
الخطوة الخامسة:
هنا انت بس بتراجع على كٌل بياناتك اللي دخلتها، وتتأكد منها او تغير فيها وتعمل Confirm عشان نروح لاخر خطوة.
الخطوة السادسة:
وصلنا لاخر خطوة واللي فيها هيوصلك لصفحة خارجية عشان تدفع بعملة بلدهم واللي هي السوم القيرغيزي بالكريديت كارد بتاعك
وطبعاً خلي بالك ان بيتضاف 10% قيمة تدبير عملة اجنبيه عالمعاملة وكل حد حسب البنك بتاعه اللي بيدفع منه.
بعد كده هتستنى من 10 لـ 15 يوم لحد ما يتم اصدار التأشيرة وهتتبعتلك بالايميل عشان تطبعها
او هيطلبوا منك بيانات تانية جديدة مثلاً على حسب كل شخص.
أخيرًا، افتكر أن متطلبات التأشيرة قد تتغير مع مرور الوقت، لذا يجب عليك دائمًا التحقق من المعلومات الحديثة من الموقع الرسمي قبل البدء في عملية التقديم للحصول على تأشيرة قيرغيزستان للمصريين.
بنتمنى لك رحلة ممتعة وآمنة إلى قيرغيزستان!
