أول حاجه – الفيزا
هي فيزا سهلة للمصريين، سعرها 20 دولار بتحولهم على حسابهم في بنك QNB وبعدين تروح السفارة في المعادي
متطلبات التأشيرة
- حجز طيران
- حجز فندق
- صورتين شخصية
- تأمين السفر – في اخر جواز السفر “الباسبور” بتاعك
بتقدم عليها في السفارة وتستلمها بعدها بأسبوعين او تلاتة بالكتير ان شاء الله 😉
الطيران ✈️
ارخص طيران مباشر من مصر لأذربيجان لحد دلوقتي هو
- طيران WizzAir من مطار برج العرب أو سوهاج لمطار أبوظبي ومن مطار أبوظبي لمطار Baku.
- طيران Air Cairo مباشر من مطار شرم الشيخ لمطار Baku علطول بس مش موجود طول السنة.
المزارات
أول يوم ممكن تاخد جولة في المدينة القديمة وهي تقريباً أقدم حاجة في المدينة هتلاقيها متحاوطة بسور وجواها برج العذراء وقصر الشروانشاهيين والإثنين في قائمة التراث العالمي لليونسكو.
التمشية
لما تزهق بقى يا صديقي خد نفسك واتمشى لحد ما توصل للمكان العظيم ده على البحر وهناك في مول اسمه Deniz Mall ممكن تتغدى فيها وبعدها تنزل من الدور اللي فوق بالزحليقة عطول وتاخد بعضك وتكمل تمشية.
بعدها بقى اطلع على مدينة اسمها جوبة (Quba) قضيلك يومين هناك أول يوم ممكن تشوي فيه في وسط الغابات وتنبسط وفي شلال قريب منهم ممكن تزوره في السريع بس الطبيعة حلوة اوي استمتع بيها.
تاني يوم روح منتجع شاهداج ( Shahdagh) والجبل ده بين حدود روسيا وأذربيجان وفی Activities كثير تقدر تعملها هناك زي ال Paragliding وال Zipline والتيلفيريك وال Coaster دي أهم لعبة مينفعش تفوتها وانت هناك.
بعدها ممكن ترجع لباكو ومنها تروح مدينة جبالا (Gebele) فيها بحيرة وشلالات وتيلفيرك برضو لطیف.
آخر وأحلى وأروق مدينة هي Sheki خطفت قلبي كده ومدينة رايقه أوى هتحب تتمشى فيها على
رجلك وتقعد فيها أكثر من يوم.
شوية معلومات
العملة عندهم اسمها مانات والمانات بيساوي 18 جنيه وربع بتاريخ المقالة
والبلد حديثة ومتطورة جداً والأسعار مش غالية ولا رخيصة
المواصلات عندهم قوية جدا جو العاصمة في مترو او باص لكن لو اكثر من حد ممكن تستخدموا أبلكيشن Bolt سعره كويس جدا هناك ورخيص
و متنساش ان الأكل عندهم شبه الأكل التركي وفي كل مكان في البلد هتشوف علم تركيا قبل علم أذربيجان وحتى لغتهم ٩٠% منها تركي.
وآخر حاجة البلد من رأي تستاهل تتراح بس ممكن تاخد معاها بلدين كمان وده اللي هقولكم عليه في مقال تاني 😉
