المقال دا ان شاء الله هيكون فيه ملخص عن ” ازاي تعمل عمرة باقل تكلفة بطريقتين “
في ناس كتير سألتني ازاي عملت العمرة و تفاصيل الرحلة بتاعتي و كدا.
مبداياً اللي هقوله ملوش علاقة باللي انا عملته عشان انا عندي فيزا السعودية الحمد لله
انما اللي هقوله في المقال دا عن تجربة 2 صحابي و عملوا الطريقتين فعلياً و كانت التجربة في خلال اول شهر سبتمبر 2023
🔵 نبدأ بالطريقة الاولى عمرة الترانزيت على ( الطيران السعودي ) :-
بتخش موقع الطيران السعودي نفسه مش اي موقع تاني و بتختار رحلتك .
مثلا من مصر الي لبنان ترانزيت جدة
بالنسبة لاسعار الطيران الاسعار بتكون متغيرة و بيكون في جدول تقدر من خلاله تختار ارخص تذكرة مناسبة ليك و كل ما كان ميعادها بعيد كل ما هتكون ارخص طبعاً .
⚠️المهم الترانزيت ميعديش 96 ساعة عشان متبقاش كاسر فيزا
1- الاول هندخل ع ويب سايت الطيران السعودي
و هعمل الـ Round Trip و هحط من مصر لـبيروت .
2- هيقعد يحمل شوية و هيجبلي اسعار اختار السعر المناسب و بعدها هكمل لحد ما هيظهرلي اوبشن Perform Umrah
3- هدوس عليها و ساعتها هيقولي حابب تعمل العمرة و انت رايح و لا انت راجع من بيروت
و بيسالني اسم المدينة اللي هقعد فيها
( انا اختارت اعمل العمرة و انا رايح ) لاني لقيت لو هعملها و انا في العودة ، هلاقي تذكرة الذهاب فيها وقت ترانزيت كبير جداً
المهم بعد ما اختارت اني هعمل العمرة و انا رايح و هقعد في جدة 4 ايام ( و جدة اقرب حاجة لمكة )
4- هيظهرلي بيانات الرحلة بعد الابديت الجديد و المهم جداً جداً ان وقت الترانيزت ميعديش 96 ساعة باي حال عشان متكونش كاسر فيزا !
5- بعد ما تختار رحلة الذهاب و تتاكد انك مش معدي 96 ساعة بتختار رحلة العودة و اقل وقت ترانيزت فيها .
6- بعد كدا بيدخلك ع صفحة الـ Passenger و هنا بتضيف بياناتك كلها و تتاكد 100% انها صح و بيانات الباسبور و ارقامك و الايميل اللي هيجيلك عليه التذكرة و الفيزا بتاع الترانزيت
7- بعد كدا دي من اهم النقط اللي نركز فيها
هيدخلك ع صفحة Seat & Extras و من هنا المفروض بنقدم ع فيزا الترانزيت
8- هيظهرلك خانة Transit Visa و مكتوبلك Get your Visa هتدخل عليها و تملى بياناتك و تتاكد ان كلها صح تمام و تكون مجهز من قبلها صورة شخصية ليك حجمها ميعديش 20KB خالص
9- بعد كدا هتدخل ع مرحلة الدفع هيظهرلك ان تمن الفيزا 762 ج.م بالظبط و بعدها هيتضاف ع تمن الرحلة الاجمالي
10 – هيجيلك مراجعة سريعة لخط سير الرحلة و عدد الطيارات و كل حاجة و بعدها هتتدفع بكارت البنك و المعاملة دي هيتضاف عليها لسا 10% تدبير عملة حتى لو دافع بالجنيه المصري .
و خدوا بالكم ان بعض كروت البنك مش بتشتغل
بس انا حجزت لصاحبي بكارت البنك اجنبي و اشتغلت عادي .
11- اخر حاجة هيجيلك ع الايميل التيكت بتاعتك و بعدها بشوية هيجيلك الفيزا تحملهم و تطبعهم
🔵 الطريقة التانية ( عمرة دايركت ) على فلاي ناس :-
التجربة كانت من مطار سفنكس و هقولكم ازاي نحجز التذكرة و نطلع التاشيرة عشان التاشيرة هنا مختلفة شوية .
1- هنفتح موقع او ابلكشين فلاي ناس و نختار Book a flight و نختار Round Trip و نكتب مطار سفنكس و متجه الي مطار جدة
2- تاني نقطة مهمة جدا و انا بختار الذهاب و العودة لازم لازم متعديش 96 ساعة باي حال من الاحول عشان تضمن انك تقدر تعمل تاشيرة المرور .
ف مثلا انا اختارت يوم 20 اكتوبر اسافر و العودة تكون يوم 23 . مينفعش الطيارة تكون يوم 19 و لاترجع بوم 24 عشان كدا هتكون كاسر فيزا . لازم الـ 96 ساعة من ضمنهم وقت الطيران .
3- هختار الرحلات المناسبة ليا كـ وقت و كـ فلوس و خدوا بالكم ان فلاي ناس بيكون حاطط حاجات اكسترا بتزود تمن التيكت ف ممكن تشيلهم اول باول لو مش محتاجهم .
4- هتخش تحط بياناتك و بيانات الباسبور و زي ما قولنا قبل كدا لازم تركز و انت بتملاهم .
5- برضو في فلاي ناس بيكون حاططلك اوبشن انك تختار كراسي ع الطيارة و سعره معقول 15 ريال للكرسي العادي مش في مكان مميز اوي . و لو مش حابب بتشيله عادي و وقت الـ Check-in في المطار بيختار كرسي عشوائي .
6- اخر خطوة و هيا الدفع بتدفع بالكارت و برضو هيتخصم تدبير عملة 10%
7- و دي نقطة مهمة جداً لما بتدفع بيظهرلك اوبشن انك تعمل تاشيرة مرور و ساعتها بتخش تحط بياناتك و تراجعها كويس و تدفع بالفيزا غالبا نفس التمن 762 ج.م و بتتبعتلك ع الايميل و حاططلكم تحت صورة من شكل التاشيرة اللي هتجيلك .
و للأسف معنديش صورة من اللي بيظهر لاني مكنتش عاملها بنفسي.
8 – لو لقدر الله مظهرتش او حاجة بتخش عادي جداً ع ادارة الحجز و تحط بيانات التذكرة و ساعتها بتقدر تعملها.
9- يفضل تعمل الحجز عن طريق الويب سايت على اللابتوب مش من الموبايل.
دي صورة التاشيرة المرور او الترانزيت للي بتيجي سواء حاجز ع الطيران السعودي او فلاي ناس
🔵 شوية نصايح هقولكم عليها عموماً .
1- بعد اما تستلم تاشيرة المرور مباشرة تحمل برنامج Nusuk و دا الخاص بتصاريح العمرة و دخول الروضة الشريفة
تدخل تحجز عمرتك و الاهم تحاول تحجز الروضة الشريفة لانهم بيركزوا جامد جدا ع التصريح و لو مش معاك مش هيدخلك و تاخده اسكرين شوت احتياطي
2- المواصلات
▫️من مطار جدة لمكة بـ 30 ريال الفرد في العربية الملاكي او التاكسي Sharing .
▫️او في عربية خاصة من مطار جدة بحوالي 130 ريال .
▫️ قطار الحرمين السريع من مطار جدة الي مكة بـ 35 ريال اعتقد
▫️من مكة الي المدينة بحوالي 70 ريال باص سابتكو او العربية الملاكي او تاكسي Sharing.
▫️قطار الحرمين السريع بـ 140 ريال من مكة الي المدينة و دا انصح بيه خصوصا لو هترجع من المدينة الي المطار عشان تسافر
بعض اسعار القطار بتتغير حسب الوقت .
لينك القطار السريع
https://sar.hhr.sa/ar/mobile-web
3- الاقامة
مش هقدر افيد فيها اوي الصراحة لاني مقعدتش في فنادق بس يفضل ان الفندق او المكان اللي هتقعد فيه يكون قريب من الحرم خصوصاً في مكة عشان طرقها جبلية ، و ضروري تراجع الريفيوز ع الفندق عشان مستوى النضافة ! .
4- الاكل
اسعاره في المتناول و كميات كويسة و بتشبع
يعني مثلا فطار ممكن 6 ريال لو فطار شعبي زي ( تميس و قلابة و عدس )
و متوسط السندوتشات بيبدا من 5 ريال
و الغدا مثلا المتعارف عليه ان الكبسة ربع فراخ بـ 10 ريال و النص بـ 20 و هكذا
و طبعا وجبات البيك بتبدا من 17 ريال اللي هيا مسحب او بروست .
و في مكة في حتة اسمها جبل عمر الدور الرابع بيكون في فود كوورت في مطاعم كتير و في كشري التحرير هناك باين .
و في تحت سوبر ماركت كبير في كل حاجة و دا في وش الحرم المكي .
5- اخر حاجة ضروري تراجعوا ( مناسك العمرة ) و كيفية الاحرام من الميقات و كل حاجة خاصة بالمناسك ، لاني معنديش معلومات كافية عنها و موضوع الاحرام من الطيارة و هكذا.
🔵 بالنسبة للمطارات محدش اتكلم خالص عن باركود العمرة او سال عليه حتى و يفضل انك متروحش المطار بلبس الاحرام و ممكن لما تعدي الجوازات و تخلص كل الاجراءات تلبس الاحرام .
🔵 اسعار المواصلات و الطيران بتتغير حسب السيزون.
🔵 يفضل لو بتحجز عمرة ترانزيت و دي الاضمن حاليا انك تختار ايام اقامة ف بيروت او اي كان الوجهة اكتر شوية من يومين او 3 عشان بيستغربوا ف المطار انت ليه داخل مدة قليلة جداً .
و في النهاية دي كانت تجربة 2 صحابي و منهم صديق كنت عامله كل الحجوزات بفضل الله و محصلش معاهم اي مشكلة ❤️
و دعواتكم ليا هناك متنسوش ❤️
